SEO ndihmon motorët e kërkimit të kuptojnë faqen dhe klientët të gjejnë informacionin që u duhet. Filloni me këto shtatë hapa dhe ndiqni ndryshimet në kërkesat që merr biznesi juaj. Hapi i fundit shpjegon si t’i matni rezultatet çdo muaj.

1. Plotësoni profilin e biznesit në Google

Nëse biznesi juaj plotëson kushtet e Google Business Profile, vendosni emrin, kategorinë, orarin dhe informacionin e saktë të kontaktit. Shihni udhëzuesin për profilin e biznesit për kushtet dhe verifikimin.

2. Shpjegoni çdo shërbim qartë

Përgjigjuni pyetjeve të klientit: çfarë përfshihet, për kë është shërbimi dhe si fillon bashkëpunimi. Përdorni shembuj nga puna juaj dhe shmangni faqe pothuajse të njëjta vetëm për qytete të ndryshme.

3. Shkruani tituj dhe përshkrime të veçanta

Titulli duhet të tregojë çfarë do të gjejë vizitori. Përshkrimi duhet ta përmbledhë faqen me fjalë të natyrshme. Për shembull, një faqe makinash me qira mund të sqarojë qytetin dhe mënyrën e rezervimit.

4. Kontrolloni faqen në telefon

Lexoni tekstet, hapni menunë dhe provoni formularin. Kontrolloni edhe shpejtësinë e faqes. Një faqe që gjendet në kërkim duhet të jetë edhe e lehtë për t’u përdorur.

5. Përdorni gjuhën e klientëve

Nisuni nga pyetjet që merrni në biseda dhe mesazhe. “Sa kushton një faqe interneti?” është një temë konkrete; përsëritja e së njëjtës fjalë kyçe në çdo paragraf nuk e bën shpjegimin më të dobishëm.

6. Lidhni përmbajtjet që plotësojnë njëra-tjetrën

Nga artikulli kaloni te shërbimi përkatës, shembujt e punës dhe kontakti. Përdorni tekste lidhjesh që tregojnë qartë ku çojnë, si shërbimet tona SEO.

7. Matni rezultatet

Përdorni tri burime: Google Search Console tregon si shfaqet faqja në kërkim, Google Analytics tregon çfarë bëjnë vizitorët pasi hyjnë, ndërsa regjistri juaj i kërkesave tregon cilët klientë erdhën nga Google. Kontrolloni të njëjtat matje çdo muaj dhe vendosni sipas kërkesave, jo vetëm sipas renditjes.

Çfarë tregon Search Console

Raporti i performancës ka katër matje kryesore:

  • Shfaqjet: sa herë u shfaq në rezultate një lidhje drejt faqes suaj.
  • Klikimet: sa herë dikush klikoi nga rezultatet për të ardhur te faqja.
  • CTR: përqindja e shfaqjeve që u kthyen në klikime.
  • Pozicioni mesatar: mesatarja e pozicionit më të lartë që zuri faqja juaj në rezultate. Ndryshon sipas kërkimit, pajisjes dhe vendit, ndaj mos e lexoni si një renditje të vetme.

Filtroni raportin sipas faqes, për shembull faqes së një shërbimi, dhe shihni me cilat kërkime shfaqet. Nëse një faqe ka shumë shfaqje, por pak klikime, rishikoni titullin dhe përshkrimin. Nëse nuk shfaqet fare, kontrolloni nëse është indeksuar: raporti i indeksimit tregon cilat faqe janë në indeksin e Google dhe pse disa jo, ndërsa inspektimi i URL-së kontrollon një faqe të veçantë, si një artikull i sapopublikuar.

Lidhni vizitat me kërkesat

Search Console ndalet te klikimi. Për të parë çfarë ndodh më pas, në Google Analytics 4 shënoni si ngjarje kyçe veprimet që kanë vlerë për biznesin: dërgimin e formularit, klikimin e numrit të telefonit ose të WhatsApp-it dhe porosinë. Provojini vetë pas konfigurimit, që të siguroheni se ngjarja regjistrohet vetëm kur veprimi kryhet vërtet. Për reklamat, dërgoni klikimet te një faqe e dedikuar dhe shënoni lidhjet me parametra UTM, si te udhëzuesi i landing page. Nëse shtoni kode matjeje, përditësoni edhe politikën e privatësisë.

Mbani edhe një regjistër të thjeshtë të kërkesave: datën, shërbimin, si ju gjeti klienti dhe nëse u bë punë. Kjo kap edhe klientët që lexojnë faqen dhe pastaj ju telefonojnë nga një pajisje tjetër. Nëse keni profil biznesi, performanca e profilit tregon telefonatat, klikimet drejt faqes dhe kërkesat për drejtime.

Si t’i krahasoni periudhat

Krahasoni periudha me të njëjtën gjatësi, për shembull 28 ditët e fundit me 28 ditët e mëparshme. Për biznese sezonale, si turizmi ose arsimi, krahasoni me të njëjtin muaj të vitit të kaluar. Shënoni datat kur ndryshuat faqen, publikuat një artikull ose nisët një reklamë, që ta dini çfarë mund ta ketë shkaktuar ndryshimin. Një rritje e shfaqjeve pa rritje të kërkesave mund të tregojë se faqja po shfaqet për kërkime që nuk lidhen me shërbimin tuaj.

Lista e kontrollit mujor

PyetjaKu ta gjeniÇfarë të bëni
A shfaqen faqet e shërbimeve?Search Console, raporti i performancës, filtri sipas faqesPër shumë shfaqje dhe pak klikime, rishikoni titullin dhe përshkrimin.
A janë indeksuar faqet e reja?Raporti i indeksimit dhe inspektimi i URL-sëLexoni arsyen që jep Google dhe lidheni faqen nga faqe të tjera të rëndësishme.
Cilat faqe sjellin kërkesa?Google Analytics, ngjarjet kyçe sipas faqes së hyrjesPërmirësoni faqet që marrin vizita, por jo kërkesa: kontaktin, shembujt dhe hapin e radhës.
Sa kërkesa erdhën nga Google?Regjistri juaj dhe performanca e profilit të biznesitKrahasoni me muajin e kaluar dhe, për biznese sezonale, me vitin e kaluar.

Nuk ka një afat renditjeje që vlen për çdo biznes. Nëse doni ndihmë për ta konfiguruar matjen ose për t’i lexuar të dhënat, shihni shërbimin SEO dhe Google ose na shkruani.

Burim për udhëzimet e përgjithshme: Google Search Central.